លោក ជិន ប៊ុនធឿន ដឹកនាំមន្ត្រីជំនាញចុះពិនិត្យការដំឡើងប្រព័ន្ធលូ និងកែលម្អចិញ្ចើមផ្លូវជាតិលេខ៥
ភ្នំពេញ៖ លោក ជិន ប៊ុនធឿន អភិបាលខណ្ឌឫស្សីកែវ បានដឹកនាំក្រុមការងារមន្ត្រីពាក់ព័ន្ធ ចុះពិនិត្យវឌ្ឍនភាពការងារស្ថាបនា ហេដ្ឋារចនាសម្ព័ន្ធ ដើម្បីដោះស្រាយបញ្ហាប្រឈមជូនប្រជាពលរដ្ឋនៅក្នុងមូលដ្ឋាន។
សកម្មភាពចុះពិនិត្យនេះ បានធ្វើឡើងនាល្ងាចថ្ងៃសៅរ៍ ទី២៣ ខែឧសភា ឆ្នាំ២០២៦ នេះ នៅតាមបណ្តោយផ្លូវលេខ ៣៦ សង្កាត់ឫស្សីកែវ និងកំណាត់ផ្លូវជាតិលេខ៥។
ធានាការរំដោះទឹក និងលើកកម្ពស់សោភ័ណភាព
នៅក្នុងបេសកកម្មចុះពិនិត្យនេះ លោកអភិបាលខណ្ឌ បានដាក់ការយកចិត្តទុកដាក់ខ្ពស់លើចំណុចសំខាន់ៗចំនួនពីរ៖
ការដោះស្រាយបញ្ហាទឹកជំនន់៖ លោក ជិន ប៊ុនធឿន បានបញ្ជាក់ថា ការរៀបចំប្រព័ន្ធលូបង្ហូរទឹក និងការកែលម្អឱ្យបានត្រឹមត្រូវតាមបច្ចេកទេស គឺជាកិច្ចការដ៏មានសារៈសំខាន់ ក្នុងការធានាឱ្យបាននូវការរំដោះទឹក និងការពារការជន់លិចដោយជំនន់ទឹកភ្លៀង។
ការរៀបចំសណ្តាប់ធ្នាប់៖ លោកបានពិនិត្យមើលការរៀបចំផ្លូវថ្មើរជើង និងការដំឡើងការ៉ូឡាថ្មីនៅលើចិញ្ចើមផ្លូវ តាមបណ្តោយកំណាត់ផ្លូវជាតិលេខ៥ ដើម្បីលើកកម្ពស់សោភ័ណភាពខណ្ឌ។
ការអំពាវនាវដល់ពលរដ្ឋ៖ ឆ្លៀតក្នុងឱកាសនោះ លោកអភិបាលខណ្ឌ ក៏បានណែនាំ និងអំពាវនាវដល់បងប្អូនប្រជាពលរដ្ឋ ឱ្យចូលរួមសហការជាមួយអាជ្ញាធរក្នុងការថែរក្សាសណ្តាប់ធ្នាប់របៀបរៀបរយតាមដងផ្លូវសាធារណៈ ជាពិសេសគឺការចូលរួមថែរក្សាអនាម័យ និងបរិស្ថានឱ្យបានល្អស្អាតជាប្រចាំ។
អត្ថបទ (លោក រ៉េត ឌីណេត កោះឯករាជ្យ)
ថ្ងៃសៅរ៍ ៧កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៣ ខែឧសភា ឆ្នាំ២០២៦