អាជ្ញាធរខណ្ឌកំបូល ចុះរៀបចំសណ្តាប់ធ្នាប់សាធារណៈ និងពង្រឹងសន្តិសុខក្នុងមូលដ្ឋាន

អាជ្ញាធរខណ្ឌកំបូល ចុះរៀបចំសណ្តាប់ធ្នាប់សាធារណៈ និងពង្រឹងសន្តិសុខក្នុងមូលដ្ឋាន

ភ្នំពេញ៖ អនុវត្តតាមការណែនាំរបស់ ឯកឧត្តម ឃួង ស្រេង អភិបាលរាជធានីភ្នំពេញ និងក្រោមការបញ្ជាផ្ទាល់ពី លោក ឃឹម ស៊ុនសូដា អភិបាលនៃគណៈអភិបាលខណ្ឌកំបូល នាព្រឹកថ្ងៃពុធ ទី០៤ ខែកុម្ភៈ ឆ្នាំ២០២៦ នេះ កម្លាំងគណៈបញ្ជាការឯកភាពខណ្ឌកំបូល បានចុះប្រតិបត្តិការរៀបចំសណ្តាប់ធ្នាប់ អនាម័យបរិស្ថាន និងពង្រឹងសុវត្ថិភាពក្នុងមូលដ្ឋាន។

ប្រតិបត្តិការនេះដឹកនាំដោយ លោក គន់ ចន្ទសុភារី អភិបាលរងខណ្ឌ តំណាងឱ្យលោកអភិបាលខណ្ឌ ដោយមានការចូលរួមពីលោកអធិការរង លោកមន្ត្រីកងរាជអាវុធហត្ថ និងកម្លាំងសណ្តាប់ធ្នាប់ខណ្ឌ-សង្កាត់។ ក្រុមការងារបានចុះត្រួតពិនិត្យរដ្ឋបាលនៅក្នុងភូមិត្រពាំងគល់ និងភូមិស្ងួនពេជ្រ សង្កាត់កន្ទោក ដោយផ្តោតលើចំណុចសំខាន់ៗដូចខាងក្រោម៖
• ការរៀបចំសណ្តាប់ធ្នាប់៖ ណែនាំដល់អាជីវករ និងម្ចាស់ផ្ទះដែលដាក់តាំងលក់សម្ភារៈ បោះចោលកាកសំណល់ ឬសាងសង់រំលោភលើចិញ្ចើមផ្លូវសាធារណៈ ដែលបង្កឱ្យមានការកកស្ទះចរាចរណ៍ និងប៉ះពាល់ដល់សោភ័ណភាព។

• ការគ្រប់គ្រងស្នាក់នៅ៖ ត្រួតពិនិត្យតាមផ្ទះជួល និងផ្ទះសំណាក់ដែលគ្របដណ្តប់លើការស្នាក់នៅរបស់ជនបរទេស ដោយតម្រូវឱ្យបង្ហាញឯកសារស្នាក់នៅឱ្យបានត្រឹមត្រូវតាមច្បាប់។

• ការបង្ក្រាបបទល្មើស៖ ផ្សព្វផ្សាយវិធានការទប់ស្កាត់បទល្មើសគ្រប់ប្រភេទ ជាពិសេសករណីឆបោកតាមប្រព័ន្ធអនឡាញ (Online Scams)។

• កិច្ចអន្តរាគមន៍បន្ទាន់៖ ជំរុញការប្រើប្រាស់លេខទូរស័ព្ទទំនាក់ទំនងដែលមានលើស្ទីគ័រ ដើម្បីរាយការណ៍ជូនមន្ត្រីប៉ុស្តិ៍រដ្ឋបាល និងអធិការដ្ឋាននគរបាលខណ្ឌ ឱ្យបានទាន់ពេលវេលា។

ក្នុងឱកាសនោះ លោក គន់ ចន្ទសុភារី ក៏បានអំពាវនាវដល់បងប្អូនអាជីវករ និងប្រជាពលរដ្ឋទាំងអស់ក្នុងខណ្ឌកំបូល មេត្តាចូលរួមសហការជាមួយអាជ្ញាធរក្នុងការថែរក្សាអនាម័យ និងសន្តិសុខ ដើម្បីសេចក្តីសុខសាន្ត និងភាពកក់ក្តៅរបស់សហគមន៍ទាំងមូល។

ផ្សាយចេញដោយ:លោក រ៉េត ឌីណេត កោះឯករាជ្យ ទំនាក់ទំនងផ្សព្វផ្សាយពាណិជ្ជកម្ម 081888767
ថ្ងៃពុធ ២រោច ខែមាឃ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៤ ខែកុម្ភៈ ឆ្នាំ២០២៦