គណៈបញ្ជាការឯកភាពរដ្ឋបាលខណ្ឌបឹងកេងកង ចុះត្រួតពិនិត្យទីតាំងសង្ស័យចំនួន ៥កន្លែង ដើម្បីទប់ស្កាត់បទល្មើសឆបោកតាមប្រព័ន្ធអនឡាញ
ភ្នំពេញ៖ អនុវត្តតាមអនុក្រឹត្យលេខ ០០៣ អនក្រ.បក របស់រាជរដ្ឋាភិបាលកម្ពុជា និងស្របតាមការណែនាំចង្អុលបង្ហាញពីសំណាក់ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ អាជ្ញាធរមានសមត្ថកិច្ចបាននិងកំពុងបន្តយុទ្ធនាការយ៉ាងសកម្មក្នុងការផ្សព្វផ្សាយ និងរឹតបន្តឹងការអនុវត្តច្បាប់ ដើម្បីបង្ក្រាបនិងទប់ស្កាត់រាល់សកម្មភាពឆបោកតាមប្រព័ន្ធបច្ចេកវិទ្យា (Online Scams) នៅក្នុងភូមិសាស្ត្ររាជធានីភ្នំពេញ។
ជាក់ស្តែង នៅថ្ងៃទី០១ ខែមិថុនា ឆ្នាំ២០២៦ គណៈបញ្ជាការឯកភាពរដ្ឋបាលខណ្ឌបឹងកេងកង ដឹកនាំដោយ លោក សុខ សម្បត្តិ អភិបាលនៃគណៈអភិបាលខណ្ឌ បានបែងចែកកម្លាំងសមត្ថកិច្ចជាច្រើនក្រុម ចុះពិនិត្យរដ្ឋបាលជាស្របពេលគ្នានៅតាមទីតាំងអាគារខុនដូរ អាផាតមិន បុរី ផ្ទះសំណាក់ និងសណ្ឋាគារមួយចំនួន ដែលជាគោលដៅសង្ស័យក្នុងភូមិសាស្ត្រខណ្ឌ។
ជាលទ្ធផល នៅក្នុងប្រតិបត្តិការចុះត្រួតពិនិត្យទីតាំងសង្ស័យសរុបចំនួន ០៥កន្លែង (ស្មើនឹង ៦២៥ បន្ទប់ និងមានជនបរទេសស្នាក់នៅសរុប ៣៣៧ នាក់ ស្រី ១៣៥ នាក់ មាន ៣៧ សញ្ជាតិ) ក្រុមការងារបានកត់ត្រាទិន្នន័យតាមទីតាំងនីមួយៗដូចខាងក្រោម៖
ក្រុមទី១៖ ដឹកនាំដោយលោក សុខ សម្បត្តិ អភិបាលខណ្ឌ បានចុះពិនិត្យអាគារខុនដូ ហ្គោលដិនវ័ន (Golden One) ស្ថិតនៅអគារលេខ៤១ ផ្លូវលេខ៣៦០ ភូមិ៧ សង្កាត់ទួលស្វាយព្រៃទី១។ អាគារនេះមានកម្ពស់ ៣៨ជាន់ ស្មើនឹង ៣២០បន្ទប់ (មានអ្នកស្នាក់នៅ ១៣បន្ទប់) ក្នុងនោះមានជនបរទេសកំពុងស្នាក់នៅសរុប ១០០នាក់ (ស្រី ៣១នាក់) ស្មើនឹង ១២សញ្ជាតិ។
ក្រុមទី៣៖ ដឹកនាំដោយលោក កឹមណៃ វីរៈខេមរា អភិបាលរងខណ្ឌ បានចុះពិនិត្យអាផាតមិន រីឆាតសិន (Richardson Apartment) ស្ថិតនៅអគារលេខ១៥៩ ផ្លូវលេខ៥១ ភូមិ៧ សង្កាត់បឹងកេងកងទី១។ អាគារនេះមានកម្ពស់ ២៣ជាន់ មានបន្ទប់សរុប ១៦០បន្ទប់ និងមានជនបរទេសកំពុងរស់នៅសរុប ១៩៩នាក់ (ស្រី ៨៨នាក់) ស្មើនឹង ៣១សញ្ជាតិ។
ក្រុមទី៤៖ ដឹកនាំដោយលោក ជ្រុន ថេរ៉ាវង្ស អភិបាលរងខណ្ឌ បានចុះពិនិត្យអគារលេខ១៣០ ផ្លូវ៣០៤ ភូមិ០៥ សង្កាត់អូឡាំពិក។ អាគារនេះមានកម្ពស់ ១២ជាន់ មានបន្ទប់ស្នាក់នៅសរុប ៧៨បន្ទប់ ប៉ុន្តែមិនមានជនបរទេសស្នាក់នៅឡើយ។
ក្រុមទី៥៖ ដឹកនាំដោយលោក សុខ វីរៈ អភិបាលរងខណ្ឌ បានចុះពិនិត្យបន្ទប់ជួលលេខ ១៤៨ZC ផ្លូវលេខ១៩៩Z ភូមិ៣ សង្កាត់ទំនប់ទឹក។ ទីតាំងនេះមានកម្ពស់ ១ជាន់ មានបន្ទប់សរុប ២បន្ទប់ និងមិនមានជនបរទេសស្នាក់នៅនោះទេ។
យោងតាមរបើការណ៍ពីសមត្ថកិច្ចជំនាញ នៅក្នុងប្រតិបត្តិការចុះពិនិត្យរដ្ឋបាលលើទីតាំងទាំង ០៥ ខាងលើនេះ គឺមិនបានរកឃើញបទល្មើសឆបោកតាមប្រព័ន្ធអនឡាញ (Online Scam) នោះឡើយ។
ទោះជាយ៉ាងណា សកម្មភាពចុះអនុវត្តច្បាប់ប្រកបដោយភាពម៉ឺងម៉ាត់ និងទាន់ពេលវេលារបស់គណៈបញ្ជាការឯកភាពខណ្ឌបឹងកេងកង ទទួលបានការគាំទ្រ និងសាទរយ៉ាងខ្លាំងពីសំណាក់ប្រជាពលរដ្ឋក្នុងមូលដ្ឋាន ដែលនេះស្តែងឱ្យឃើញពីការជឿជាក់លើចំណាត់ការរដ្ឋបាល ក្នុងការធានាសន្តិសុខ សុវត្ថិភាព និងការពារទ្រព្យសម្បត្តិ-អាយុជីវិតរបស់ប្រជាពលរដ្ឋពីការគំរាមកំហែងនៃបទល្មើសបច្ចេកវិទ្យា។
ក្នុងឱកាសចុះបេសកកម្មនោះដែរ លោក សុខ សម្បត្តិ ក៏បានបង្ហាញនូវការយកចិត្តទុកដាក់ចំពោះសុខទុក្ខរបស់ប្រជាពលរដ្ឋ តាមរយៈការអំពាវនាវ និងលើកទឹកចិត្តឱ្យបងប្អូនប្រជាពលរដ្ឋទាំងអស់ ចូលរួមសហការជិតស្និទ្ធជាមួយអាជ្ញាធរមូលដ្ឋាន។ លោកបានបញ្ជាក់ថា ការរួមចំណែកផ្តល់ព័ត៌មាន និងរាយការណ៍រាល់ការសង្ស័យជុំវិញទីតាំងប្រមូលផ្តុំខុសប្រក្រតី គឺជាកត្តាដ៏សំខាន់ដែលជួយឱ្យសមត្ថកិច្ចអាចចុះអន្តរាគមន៍ ត្រួតពិនិត្យ និងទប់ស្កាត់បានទាន់ពេលវេលា ដើម្បីរួមគ្នាបង្កើតសហគមន៍មួយប្រកបដោយសុវត្ថិភាព និងការអភិវឌ្ឍប្រកបដោយនិរន្តរភាព៕
រាយការណ៍ដោយ៖ លោក រ៉េត ឌីណេត (កោះឯករាជ្យ)
កាលបរិច្ឆេទ៖ ថ្ងៃចន្ទ ១រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី០១ ខែមិថុនា ឆ្នាំ២០២៦