អាជ្ញាធរខណ្ឌព្រែកព្នៅ ចុះពិនិត្យការស្តារប្រឡាយអមមហាវិថីឈ្នះ-ឈ្នះ ដើម្បីបង្ការការលិចលង់ក្នុងរដូវវស្សា
ភ្នំពេញ៖ អាជ្ញាធរខណ្ឌព្រែកព្នៅ បានចុះពិនិត្យវឌ្ឍនភាពនៃការស្តារប្រឡាយទឹក អមមហាវិថីឈ្នះ-ឈ្នះ ក្នុងភូមិសាស្ត្រសង្កាត់គោករកា ដើម្បីត្រៀមលក្ខណៈរំដោះទឹក និងបញ្ចៀសការជន់លិចដោយទឹកភ្លៀង នារដូវវស្សាដែលកំពុងចូលមកដល់។
សកម្មភាពចុះត្រួតពិនិត្យនេះ ត្រូវ បានធ្វើឡើងនៅព្រឹកថ្ងៃទី២១ ខែឧសភា ឆ្នាំ២០២៦ នេះ ដឹកនាំដោយលោក ធឹម សំអាន អភិបាលនៃគណៈអភិបាលខណ្ឌព្រែកព្នៅ រួមជាមួយលោក វណ្ណា លីនសច្ចនា អភិបាលរងខណ្ឌ និងអាជ្ញាធរមូលដ្ឋានសង្កាត់គោករកា។
ក្នុងឱកាសចុះពិនិត្យការដ្ឋាននោះ លោកអភិបាលខណ្ឌ បានណែនាំ និងអំពាវនាវដល់បងប្អូនប្រជាពលរដ្ឋ ដែលមានលំនៅឋាននៅក្បែរនោះ ហើយបានសាងសង់សំណង់ ឬតសំយ៉ាបផ្ទះរំលោភលើចំណីប្រឡាយ ឱ្យស្ម័គ្រចិត្តរុះរើចេញ។ ការស្នើសុំនេះ គឺដើម្បីសម្រួលដល់គ្រឿងចក្រក្នុងការប្រតិបត្តិការការងារឱ្យបានលឿន និងដើម្បីលើកកម្ពស់សោភ័ណភាព បរិស្ថាននៅក្នុងមូលដ្ឋានផងដែរ។
ជុំវិញវិធានការនេះ ប្រជាពលរដ្ឋរស់នៅក្នុងតំបន់នោះ បានសម្តែងការគាំទ្រចំពោះចំណាត់ការរបស់អាជ្ញាធរ ក្នុងការស្តារប្រឡាយរំដោះទឹកនេះឡើងវិញ ព្រោះវាអាចជួយកាត់បន្ថយការលិចលង់លំនៅឋានរបស់ពួកគាត់នៅពេលមានភ្លៀងធ្លាក់ខ្លាំង។ ចំពោះការណែនាំឱ្យរុះរើសំណង់ខុសច្បាប់ ឬសំយ៉ាបផ្ទះដែលរំលោភលើចំណីប្រឡាយ ម្ចាស់សំណង់មួយចំនួនបានយល់ព្រម និងសន្យាចូលរួមសហការជាមួយក្រុមការងារបច្ចេកទេស ដើម្បីឱ្យការស្តារប្រឡាយនេះប្រព្រឹត្តទៅដោយរលូន។
អត្ថបទ:លោក រ៉េត ឌីណេត និពន្ធនាយក កោះឯករាជ្យ 081888767
ថ្ងៃសៅរ៍ ៧កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៣ ខែឧសភា ឆ្នាំ២០២៦