លោក យ៉ាន់ រឿន ចុះពិនិត្យការរៀបចំទីតាំងផ្តល់សេវាអត្តសញ្ញាណប័ណ្ណ និងចុះពង្រឹងការងារមូលដ្ឋាន
កណ្តាល៖ លោក យ៉ាន់ រឿន សមាជិកគណៈអចិន្រ្តៃយ៍គណបក្ស ស្រុកខ្សាច់កណ្តាល បានចុះពិនិត្យយ៉ាងយកចិត្តទុកដាក់លើការរៀបចំទីតាំងសម្រាប់ផ្តល់សេវាថតអត្តសញ្ញាណប័ណ្ណជូនប្រជាពលរដ្ឋ និងបានបន្តចុះតាមដានកិច្ចប្រជុំប្រចាំខែនៅថ្នាក់មូលដ្ឋាន ដើម្បីធានាប្រសិទ្ធភាពនៃការបម្រើសេវាសាធារណៈ និងការពង្រឹងការងារនៅមូលដ្ឋាន។
សកម្មភាពចុះមូលដ្ឋាននេះ ត្រូវបានធ្វើឡើងនៅព្រឹកថ្ងៃសៅរ៍ ៥កើត ខែផល្គុន ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២១ ខែកុម្ភៈ ឆ្នាំ២០២៦ ដោយមានការអញ្ជើញចុះផ្ទាល់ពីសំណាក់ លោក យ៉ាន់ រឿន សមាជិកគណៈអចិន្ត្រៃយ៍គណបក្សស្រុក តំណាងលោក ចេង ឌីណា ប្រធានគណៈអចិន្ត្រៃយ៍គណបក្សស្រុកខ្សាច់កណ្តាល ខេត្តកណ្តាល។
យោងតាមរបាយការណ៍សកម្មភាព បេសកកម្មនៅព្រឹកនោះត្រូវបានបែងចែកជាពីរគោលដៅសំខាន់ៗ។ គោលដៅទី១ លោក យ៉ាន់ រឿន បានអញ្ជើញចុះទៅកាន់សាលាឃុំជ័យធំ ដើម្បីពិនិត្យមើលការរៀបចំទីតាំង និងសម្ភារបរិក្ខារនានា ក្នុងការត្រៀមផ្តល់សេវាថតអត្តសញ្ញាណប័ណ្ណសញ្ជាតិខ្មែរជូនប្រជាពលរដ្ឋក្នុងឃុំ។ ការរៀបចំនេះ គឺផ្តោតសំខាន់លើការសម្រួលដល់យុវជនដែលទើបគ្រប់អាយុ ១៥ឆ្នាំ និងប្រជាពលរដ្ឋដែលអត្តសញ្ញាណប័ណ្ណអស់សុពលភាព ហើយត្រូវថតធ្វើថ្មីឡើងវិញ ខណៈដែលយុទ្ធនាការថតផ្លូវការនឹងត្រូវរៀបចំឡើងនៅថ្ងៃអាទិត្យ ទី២២ ខែកុម្ភៈ ឆ្នាំ២០២៦។
បន្ទាប់ពីបានពិនិត្យការរៀបចំនៅឃុំជ័យធំរួចរាល់ សម្រាប់គោលដៅទី២ លោក យ៉ាន់ រឿន បានបន្តដំណើរចុះទៅកាន់ឃុំវិហារសួគ៌ ស្រុកខ្សាច់កណ្តាល ដើម្បីតាមដាន និងពិនិត្យមើលដំណើរការនៃកិច្ចប្រជុំប្រចាំខែកុម្ភៈ ឆ្នាំ២០២៦ របស់អនុសាខាគណបក្សភូមិព្រៃធំ និងភូមិស្វាយមាស។ ការចុះតាមដាននេះ គឺដើម្បីក្តាប់យកនូវបញ្ហាប្រឈម សំណូមពររបស់ប្រជាពលរដ្ឋនៅមូលដ្ឋាន និងដើម្បីវាយតម្លៃលើលទ្ធផលការងារប្រចាំខែរបស់ថ្នាក់ដឹកនាំមូលដ្ឋាន។
ការចុះបំពេញការងារយ៉ាងសកម្មរបស់ថ្នាក់ដឹកនាំស្រុកខ្សាច់កណ្តាលនាពេលនេះ បានបង្ហាញពីការយកចិត្តទុកដាក់ខ្ពស់ក្នុងការខិតគៀកប្រជាពលរដ្ឋ ពិសេសការជួយសម្រួលដល់ការធ្វើឯកសារគតិយុត្ត (អត្តសញ្ញាណប័ណ្ណ) ដែលជាឯកសារគោលដ៏មានសារៈសំខាន់បំផុតសម្រាប់ប្រជាពលរដ្ឋក្នុងការប្រើប្រាស់ប្រចាំថ្ងៃ និងទទួលសេវាផ្សេងៗពីរដ្ឋ៕
អត្ថបទដោយ រ៉េត ឌីណេត 081888767