សាខាសមាគមនារីក្រសួងព័ត៌មាន ចុះសួរសុខទុក្ខ និងនាំយកអំណោយជូនអតីតមន្ត្រីរាជការជានិវត្តជនចំនួន ២រូប

ភ្នំពេញ៖ ថ្នាក់ដឹកនាំនៃសាខាសមាគមនារីកម្ពុជាដើម្បីសន្តិភាព និងការអភិវឌ្ឍ ក្រសួងព័ត៌មាន បានចុះសួរសុខទុក្ខ និងនាំយកស្បៀងអាហារព្រមទាំងថវិកាទៅឧបត្ថម្ភជូនអតីតមន្ត្រីរាជការជានិវត្តជនចំនួន ២រូប ដើម្បីជាការសម្តែងនូវការដឹងគុណចំពោះការលះបង់កម្លាំងកាយចិត្តក្នុងវិស័យព័ត៌មាននាពេលកន្លងមក។

យោងតាមការចុះផ្សាយលើទំព័រហ្វេសប៊ុកផ្លូវការរបស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន នាដកាលល្ងាចថ្ងៃទី២៧ ខែមិថុនា ឆ្នាំ២០២៦ នេះ បានឱ្យដឹងថា សកម្មភាពមនុស្សធម៌នេះត្រូវបានដឹកនាំដោយ លោកជំទាវ ទុយ សិរីរតនៈ នេត្រភក្ត្រា ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងការអភិវឌ្ឍក្រសួងព័ត៌មាន តំណាងដ៏ខ្ពង់ខ្ពស់របស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជាវិស័យព័ត៌មាន (អ.ន.ក វិស័យព័ត៌មាន)។

អតីតមន្ត្រីរាជការដែលទទួលបានការសួរសុខទុក្ខ
នៅក្នុងបេសកកម្មនេះ ក្រុមការងារបានអញ្ជើញទៅសួរសុខទុក្ខផ្ទាល់ដល់លំនៅឋានរបស់អតីតមន្ត្រីរាជការចំនួន ២រូប រួមមាន៖
១. លោក ធន់ សារឹម អតីតមន្ត្រីរាជការបម្រើការងារនៅអគ្គលេខាធិការដ្ឋាន។
២. លោកស្រី ហួត ផល្លីន អតីតមន្ត្រីរាជការបម្រើការងារនៅអគ្គនាយកដ្ឋានទីភ្នាក់ងារសារព័ត៌មានកម្ពុជា (AKP)។

សមាសភាពអមដំណើរក្នុងឱកាសនោះ រួមមាន លោកជំទាវ សន ម៉ារ៉ាដា រដ្ឋលេខាធិការ និងជាសមាជិក អ.ន.ក វិស័យព័ត៌មាន, លោកជំទាវ ទេស ផល្លីន អគ្គលេខាធិការ និងជាប្រធានលេខាធិការដ្ឋាន អ.ន.ក វិស័យព័ត៌មាន ព្រមទាំងថ្នាក់ដឹកនាំ និងសមាជិក សមាជិកានៃលេខាធិការដ្ឋាន អ.ន.ក វិស័យព័ត៌មាន ជាច្រើនរូបទៀត។

ការឧបត្ថម្ភ និងការផ្សារភ្ជាប់ទំនាក់ទំនង
ក្នុងឱកាសជួបសំណេះសំណាលនោះ លោកជំទាវ ទុយ សិរីរតនៈ នេត្រភក្ត្រា បានពាំនាំនូវប្រសាសន៍ផ្តាំផ្ញើសាកសួរសុខទុក្ខប្រកបដោយក្តីនឹករលឹកពីសំណាក់ ឯកឧត្តម នេត្រ ភក្ត្រា។ លោកជំទាវបានគូសបញ្ជាក់ថា ថ្នាក់ដឹកនាំក្រសួងព័ត៌មានជានិច្ចកាលតែងតែចងចាំ និងដឹងគុណចំពោះគុណបំណាច់របស់បងប្អូនអតីតមន្ត្រីទាំងអស់ ដែលបានរួមចំណែកយ៉ាងសកម្មក្នុងការអភិវឌ្ឍវិស័យព័ត៌មាន និងសោតទស្សន៍នៅកម្ពុជា។

ដើម្បីជួយសម្រាលការលំបាកក្នុងជីវភាព និវត្តជនទាំង ២រូប ទទួលបានអំណោយឧបត្ថម្ភពីសំណាក់ ឯកឧត្តមរដ្ឋមន្ត្រី និងលោកជំទាវ ដោយក្នុងម្នាក់ៗទទួលបាន៖

អង្ករ ចំនួន ៣បេ

មី ចំនួន ២កេស

ត្រីខ ចំនួន ១កេសធំ

ទឹកសុទ្ធ ចំនួន ២កេសធំ

ទឹកត្រី ១យួរ និងទឹកស៊ីអ៊ីវ ១យួរ

ថវិកាចំនួន ២០ម៉ឺនរៀល

បន្ថែមពីលើការផ្តល់ជំនួយឧបត្ថម្ភ ក្រុមការងារក៏បានណែនាំ និងជូនដំណឹងអំពីនីតិវិធីនៃការចុះឈ្មោះជាសមាជិកសមាគមនិវត្តជន ជូនដល់អតីតមន្ត្រីទាំងពីររូបផងដែរ។ ការណ៍នេះធ្វើឡើងក្នុងគោលបំណងផ្សារភ្ជាប់ទំនាក់ទំនងឱ្យកាន់តែជិតស្និទ្ធ និងដើម្បីធានាថាពួកគាត់នឹងទទួលបានការយកចិត្តទុកដាក់ និងគាំពារបន្ថែមទៀតនាពេលអនាគត។

ព័ត៌មានគួររំលឹក៖ កាលពីថ្ងៃទី១៥ ខែមិថុនា ឆ្នាំ២០២៦ កន្លងទៅថ្មីៗនេះ ក្រសួងព័ត៌មានក្រោមការដឹកនាំរបស់ ឯកឧត្តម នេត្រ ភក្ត្រា និងលោកជំទាវ ក៏បានរៀបចំពិធីជួបសំណេះសំណាលទ្រង់ទ្រាយធំជាលើកដំបូង ជាមួយមន្ត្រីរាជការជានិវត្តជននៃក្រសួងព័ត៌មាន សរុបប្រមាណ ២៥០រូប រួចមកហើយ ដែលនេះស្តែងឱ្យឃើញពីយន្តការយកចិត្តទុកដាក់ជាប្រព័ន្ធ និងជាប់ជាប្រចាំចំពោះអតីតបុគ្គលិកសិក្សានិងមន្ត្រីរាជការចាស់ៗ៕
អត្ថបទ៖ (លោក រ៉េត ឌីណេត កោះឯករាជ្យ)
ផ្សាយចេញ៖ ថ្ងៃទី២៧ ខែមិថុនា ឆ្នាំ២០២៦